Naipilaan iti kaso ti maysa a vegetable purchaser gapu iti panangbagsolna iti kapadana a vegetable purchaser iti pagserrekan wenno entrance iti La Trinidad Trading Post.
Ti suspect ket maysa a lalaki nga agtawen iti 59 a tubo sadiay Leyte ngem residente iti agdama idiay Rockyside,Lubas, La Trinidad.
Ti biktima ket maysa a babae nga agtawen iti 37 a residente met iti Betag, La Trinidad, Benguet.
Ti insidente ket naimatangan iti maysa nga agtawen iti 41 a Barangay Tanod iti Barangay Pico iti kapada metlaeng a munsipyo.
Sigun iti imbestigasyon iti kapulisan,paturong ti witness tapno agreport iti duty daytoy idi nangngeganna ti biktima nga agpukpukkaw bayat a bagbagsulen ti suspect iti pagserrekan sadiay La Trinidad Trading Post.
Gapu iti dayta,dagus nga immarayat ti witness nu sadino, tenengngelna ti suspect.
Karaman met nga immarayat ti maysa a duty watchman nu sadino, daytoyen ti nangala iti armas ti suspect.
Kasaruno dayta, dagus nga naiturong ti biktima iti pagagasan a nagsagrap iti sugat iti makinkanigid a barukongna ken laceration iti ramay daytoy.
Sigun pay kadagiti maseknan a kameng iti pulisya, imbinglay ti live-in partner ti biktima a ti suspect ket sigud nga empleyado dagitoy a mangideldeliver iti kuarta kadagiti suplayerda nu sadino, sinisanteda daytoy iti trabaho gaputa saanna a naideposit dagiti kuarta a naskenna nga ideposit.
Kabayatanna, kalpasan iti insidente ket dagus met a naiturong ti suspect iti La Trinidad Municipal Police Station.//Bombo Genzel Depayso
