Inlawlawag ni PMAJ Wilbert Padngaran, Chief of Police ti Station 9 a saan a shooting incident ti napasamak sadiay San Carlos Heights, Baguio City ita nga aldaw.
Daytoy ket kalpasan dagiti nagwaras a sayangguseng iti social media a pamaltog ti napasamak.
Sigun kenni PMAJ Padngaran, vehicular accident ti napasamak nu sadino naigalis ti eco-sport vehicle a nangitunda iti panakabaliktad daytoy.
Dagus met a narespondean ti panagtumba ti lugan gapu ta manarimaan ti panagronda dagiti pulis idi kellaat a napasamak daytoy kasta met a naawagan ti ambulansya ken dagiti maseknan nga ahensiya para iti panakaiguyod ken panaka-“tow” ti lugan.
Maibasar iti imbestigasyon, kinuna ni PMAJ Padngaran nga adda iti impluwensya iti arak ti drayber.
Gapu iti dayta, nagpalagip ni PMAJ Padngaran kadagiti amin a motorista a saan dagitoy nga ag-iggem ti manibela nu ammoda a nakainomda tapno maliklikan ti anyaman nga aksidente.
Addan met iti nasayaat a kasasaad ti drayber.
