BAGUIO CITY – Mapatta-patta a ngimmato iti 35% ti kaado dagiti basura a naurnong iti Baguio City kabayatan ti holiday season.
Sigun kenni GSO head Eugene Buyucan, immado ti basura gaputa malaksid a narambakan ti holiday season ket napalubosan pay ti panagturong dagiti turista ditoy siudad.
Inaklonna a naadaanda ti backlog iti maysa nga aldaw a panagkolektarda ti basura.
Inlawlawagna a gapu daytoy iti pannakadadael ti maysa a garbage truck isu’t gapuna nga adda dagiti barangay a saan a nakolektar ti basurana.
Inayonna a nakaapektar metlaeng ti nailet a gunay ti trapiko no sadino nagpaut iti dua nga oras partikular sadiay Marcos Highway.
Iti baet daytoy, impetteng ni Buyucan nga kinolektarda metlaeng dagiti basura babaen kadagiti daduma a truck a nakaipalpas iti collection point-da nupay naladaw daytoy.
Iti agdama ket nagsubli metten ti normal a kasasaad iti panagkolektar ti General Service Office iti basura ti Baguio City. (with Bombo Brigit Marcasi)
