BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ti maysa a Yemeni national gapu iti panagtaripatona iti marijuana iti pagtaenganna sadiay Purok 5, Bakakeng Central, Baguio City.
Nabigbig daytoy a ni Hussain Muaad Hasan alyas Muath Yaf.
Kinuna ti PDEA-Cordillera nga inserbida ti search warrant iti pagtaengan ni Hasan.
Nadiskobreda met ti tallo a masitera ti marijuana plants ken napagango a bulong ti marijuana iti nasao a pagtaengan.
Naamuan a masansan nga agturturong iti nasao a pagtaengan dagiti mid-eastern nationals ken adda dagiti Pilipina a kadwa dagitoy.
Naipasidong ti pagtaengan ni Hasan iti nainget a panagwanawan dagiti operatiba kalpasan a naiyuman kadakuada ti kinaariwawa daytoy ken dagiti kakadwana tunggal adda dagitoy iti impluwensia ti iligal a droga.
Kinumpiskar dagiti operatiba ti PDEA-Cordillera dagiti iligal a mula nga agserbi nga ebidensia kontra kenni Hasan.
Naituding pay a mangisayangkat ti PDEA-Cordillera iti background investigation kenni Hasan ken kadagiti kakadwana mainaig iti koneksion wenno pakainaiganda iti iligal a droga.
