BAGUIO CITY – Narekober dagiti otoridad ti 10 a gramo ti napagango a marijuana tops iti parke sadiay Malcolm Square ditoy siudad ti Baguio idi kalman.
Maibasar iti report ti pulisya, nakaawat iti tawag ti maysa a personnel ti Baguio City Police Office – Station 7 manipud iti Barangay Kagawad ti Barangay Malcolm Square seknan iti nasarakan a marijuana sadiay.
Dagus a nagresponde dagiti otoridad ken insuro ti nasao a kagawad ti ayan ti nakasarakanda kadagiti nasao a marijuana.
Narekober ti kontrabando a naikabil iti dua a zip lock plastic bags ken nakadisso iti maysa kadagiti pagtugawan iti parke.
Naamuan a nasarakan daytoy ti dua a babai ken dagus nga inreportda kadagiti gwardia kadagiti establishimento nga asideg iti parke.
Iti agdama, agtultuloy ti imbestigasyon tapnu mabigbig no asino ti nangibati iti nasao a kontrabando.
