BAGUIO CITY – Dandanin maragpat ti 100% a vaccination rate kadagiti balud iti rehion Cordillera.
Sigun kenni Jail Inspector Erlinda Las-egan, panakangiwat ti Bureau of Jail Management and Penology (BJMP)-Cordillera, walo laengen a balud iti rehion ti saan pay a nabakunaan kontra iti COVID-19 manipud iti 1,116 a pakabuklan a bilang dagitoy.
Inlawlawagna met a dagiti walo a balud ket kaipispisok iti pagbaludan isut gapuna a manarimaan ti koordinasyonda kadagiti maseknan a Health Office para iti panakabakuna dagitoy.
Dinakamatna met nga 11 laeng ti saan pay a nabakunaan manipud iti 521 a personnel ti BJMP-Cordillera.
Sigun kenkuana, siyam kadagiti saan pay a nabakunaan ti maipaspasidong iti Jail Basic Recruitment Course bayat a ti maysa ket addaan ti medical condition ken ti maysa pay ket addaan ti personal a rason.
Nupay kasta, agtultuloy ti panang-guyugoyda kadagiti amin a personnel ti BJMP-Cordillera iti panagpabakuna dagitoy kontra iti COVID-19.
