BAGUIO CITY – Nadangran ti 11 nga indibidual iti pakapugsat ti nagnaanda a foot bridge sadiay Sitio Futyang, Betwagan, Sadanga, Mt. Province itay agsapa.
Sigun kenni PCapt. Nelson Judan, hepe ti Sadanga Municipal Police Station, naggigiddan a nagna wenno nagballasiw dagiti biktima iti daan a Fotyang Footbridge idi killaat a napugsat ti kable ti rangtay a rason iti panakatnag dagiti biktima iti karayan.
Naamuan a dagiti biktima ket sangapulo a lallaki ken maysa a babai ken dagitoy ket nagtaud iti lamay ti kalugaranda sadiay.
Kinunana nga overloading ti rason ti aksidente nangrunata daanen ti nasao a footbridge.
Innayonna a dagus a nagresponde dagiti maseknan iti aksidente.
Naitaray dagiti pito a biktima iti Bontoc General Hospital ken Luis Hora Memorial Hospital para iti panakataming dagitoy bayat a dagiti uppat ket nagsagrap iti minor injuries.
Nabigbig dagiti pito a naitaray iti pagagasan a da Franklin Makchong, Rudy Yakak, Anggara Kayang-o, Aneo Estiman, Fanao Lumiseb, Monger Tinmakcheg ken ni Armand Agayyong.
Nabigbig met dagiti nagsagrap iti minor injuries a da Ginaya Ekwasen, Julius Kayang-o, Henry Tangkiyao ken Vivian Kayang-o.
