LA TRINIDAD, BENGUET – Nasurok maysa a bulanen ket saan pay a nabirukan ti bagi ti 16-anyos a lalaki a mapapati a nalmes ken naiyanod iti creek idiay Mamaga, Balili, La Trinidad, Benguet idi pay Setyembre 1, 2024.
Nupay kasta, saan latta a simmardeng dagiti kameng ti La Trinidad Municipal Disaster Risk Reduction and Management Office ken ti La Trinidad Municipal Police Station.
Iti interview ti Bombo Radyo, kinuna ni Yoshi Labi manipud iti La Trinidad Municipal Disaster Risk Reduction and Management Office, nakikoordinardan kadagiti kakadwada nga opisina idiay La Union nga ipakaammoda kadakuada nu masarakanda ti bagi ti biktima.
Dinakamat ni Labi a simmardeng metten dagiti dadduma a volunteers a makipaset iti search and retrieval operation.
Inaklon met ni Labi a maysa kadagiti karit iti panangsarakda iti bagi ti biktima ket ti nalibeg a danum ken ti nauneg a paset ti creek.
