BAGUIO CITY – Binarikadaan dagiti otoridad ti 17 nga usok sadiay Sitio Texas ken Sitio Mexico sadiay Barangay Camp 4, Tuba, Benguet.
Iti panakaiyuman ti Bombo Radyo-Baguio kenni Police Major James Acod, hepe ti Tuba PNP, kinunana a nakaawatda iti report seknan iti operasyon ti iligal a panagminas iti nasao a lugar.
Kinunana a dagus a nakikoordinarda iti Department of Environment and Natural Resources ken Environmental Management Bureau para iti panakaisayangkat ti Oplan Minas wenno anti-small scale mining operation.
Sigun kenkuana, nagpositibo ti panagsukimatda iti report ken ditoy a nakasarakda iti 11 nga usok nga aktibo a maar-aramat iti panagminas ken 6 nga usok a saan a maminminas malaksid iti maysa a dismantled ball mill wenno paggilingan.
Innayon ni Acod nga amin dagiti nasarakan nga usok ken ti ayan ti paggilingan ket nabarikadaan ken kinabilanda kadagiti tarpaulin a mangipakpaka-ammo a nairikep dagitoy.
Nupay kasta, imbingayna nga awan ti nakumpiskarda a mining paraphernalia ken awan ti nadanun wenno naaktuwanda nga agminminas kadagiti nasao nga usok.
Binilinda pay dagiti opisyal ti nasao a barangay para iti nainget a panangbantayda iti aniaman nga operasyon ti small scale mining sadiay.
