BAGUIO CITY – Nakemmeg ti 19 nga indibidual iti nagsisina nga anti-illegal gambling operations dagiti otoridad iti probinsia ti Kalinga ken Abra idi kanikadua.
Nakemmeg ti siyam nga indibidual iti probinsia ti Kalinga kalpasan a naaktuwan dagitoy a mangipatpatungpal iti Tupada iti maysa pagpallotan sadiay Barangay Malin-awa, Tabuk City.
Nakumpiskar met ti innem a parapallot a manok; dua a derby box; dua a bayong ken ti taya dagiti suspek.
Kabayatanna, natiliw ti sangapulo indibidual sadiay Abra no sadinno nakumpiskar metlaeng kadakuada ti set ti cards ken taya nga inaramatda iti panagsugal.
Malaksid iti dayta, naaktoan met dagiti otoridad ti innem a lallako nga agay-ayayam iti dice a naawagan kas dado sadiay Brgy. Zone 3, Bangued, Abra.
Nakumpiskar met kadagitoy ti taya, tube pipe, lamisaan ken 44 nga bet chips, dua nga dice ken dua nga saucer plates a naaramat iti iligal a panagsugal.
