BAGUIO CITY – Nakemmeg ti dua nga indibidual iti pannakaiserbi ti Search Warrant iti maysa nga establisiemento a maatap a drug den sadiay A. Bonifacio Street, Barangay A.B.C.R, Baguio City idi rabii.
Nabigbig dagiti nakemmeg a da Alvin Estoque Lachica, 42-anyos, balo, tubo ti Rosario, La Union ken ni Carmina Patacsil, 41-anyos, naasawaan, tubo ti Tuba, Benguet, maysa a high value target ken agpada dagitoy a residente ti Aurora Hill, Baguio City.
Nakumpiskar kadagiti dua ti innem a pakete ken maysa a vial a naglaon ti maatap a shabu nga agdagsen iti mapattapatta a 30-40 a gramo ken aggatad iti mapattapatta a P180,000.
Nakumpiskar met iti ikot ni Lachica ti maysa a caliber 22 a naglaon ti bala ken maysa a caliber 32 a naglaon metlaeng iti bala.
Nakumpiskar pay dagiti nagduduma a drug paraphernalia iti panangsawar dagiti otoridad iti uneg ken aglawlaw ti nasao nga establishimento.
Sigun kadagiti otoridad, subject ti naipatungpal a seach warrant ti managan iti Lito Decipeda ngem saan daytoy a nadanon dagiti otoridad iti nasao nga establisiemenento.
Nupay kasta, nagresulta met ti operasion iti panakakemmeg da Lachica ken Patacsil bayat a maan-anop ita ni Decipeda.
Sumango da Lachica ken Decipeda iti kaso a panaglabsing iti RA 9165 bayat a sumango ni Patacsil iti kaso a panaglabsing iti RA 9165 ken RA 10591.
Iberberipikar metten dagiti otoridad ti impormasyon nga adda dagiti estudiante nga agturturong iti nasao a maatap a drug den nangruna ta asideg laeng daytoy iti dakkel nga unibersidad.
Personal pay a nagturong ni Mayor Benjamin Magalong iti nasao a lugar kabayatan ti operasion ken dinayawna ti PDEA, NBI ken BCPO gapu iti balligi nga operasion dagitoy kontra iti iligal a droga.
