![](https://img.bomboradyo.com/baguio/2019/10/eritrean.jpg)
BAGUIO CITY – Nakemmeg ti dua a gangannaet nga estudyante gapu iti panangibiaheda iti marijuana iti naisayangkat a checkpoint operation sadiay Lamut, Ifugao.
Nabigbig dagitoy a da Saffi Mohamednur, 28-anyos, agnanaed sadiay Veraville, Las Piñas City ken ni Negash Abede Natnael, 24-anyos, agnanaed sadiay Leveriza Street, Asiawealth, Pasay City ken dagitoy ket agpada a tubo ti pagilian nga Eritrea.
Sigun iti PDEA-Cordillera, naglugan dagiti dua iti parapasahero a bus manipud Bontoc, Mt. Province paturong sadiay Cubao.
Nupay kasta, nakemmeg dagitoy kalpasan a nakumpiskar kadakuada ti kontrabando a nakita iti naisayangkat a checkpoint operation.
Nakumpiskar iti dua a gangannaet ti innem a tubular form ti dried marijuana leaves nga aggatad ti P780,000.
Naamuan pay a nagpason ti student visa dagiti dua idi pay napalabas a tawen.
Sumangsango ita dagiti nasao a gangannaet iti kaso a panaglabsing iti RA 9165 wenno ti Comprehensive Dangerous Drugs Act of 2002.