BAGUIO CITY – Nakemmeg ti dua a turista gapu iti panangibiaheda iti marijuana sadiay Sadanga, Mountain Province.
Babaen iti checkpoint operation sadiay Sitio Tabrak, Barangay Anabel ket pinara dagiti otoridad ti motorsiklo a nagluganan dagiti dua a turista ken sadiay a nakita iti bag dagitoy dagiti iligal a mula.
Nabigbig ti driver ti motorsiklo a ni John John Salvador Corral, 27-anyos, baro, graphic artist bayat a ti backrider daytoy ket 17-anyos ken agpadada a residente ti Gumamela Street, Santa Cruz, Antipolo City.
Nakumpiskar met kadagitoy ti dua a marijuana bricks ken uppat a tubular form ti marijuana nga agdagsen amin iti 4,100 grams ken aggatad ti P492-K.
Iti agdama, sumangsango dagiti dua iti kaso a panaglabsing iti Comprehensive Dangerous Drugs Act of 2002.
