![](https://img.bomboradyo.com/baguio/2019/09/SSEAYP.jpg)
BAGUIO CITY – Magagaranen ti dua a young professionals manipud Baguio City a karaman kadagiti 27 a delagado a mangibagi iti Pilipinas kas Philippine Ambassadors of Goodwill iti maika-46 a Ship for Southeast Asian and Japanese Youth Program (SSEAYP).
Napili kas panakabagi ti Cordillera ni Adrian Fernandez, sigud a tourism operations officer ti Department of Tourism – Cordillera bayat a napili kas panakabagi ti Region 1 ni Franzes Ivy Carasi, part-time college professor ditoy Baguio.
Iti interview ti Bombo Radyo-Baguio kenni Fernandez, kinunana nga ipangrunana ti panakaitandudo ti turismo kabayatan ti nasao nga aktibidad.
Ni Fernandez ket sigud a tourism operations officer ti Department of Tourism – Cordillera ken addaan daytoy iti adbokasiya a mangguyugoy kadagiti agtutubo iti panakipasetda iti nation-building babaen iti responsable ken nasustinir a turismo ken financial literacy.
Nabigbig daytoy kas maysa kadagiti Ten Outstanding Students of the Cordillera Administrative Region (OSCAR) idi 2009 ken ita ket presidente ti OSCAR Alumni Community.
Iti met interview ti Bombo Radyo-Baguio kenni Carasi, kinunana a sipapannakkel daytoy iti panakipasetna iti nasao nga aktibidad ken ibilbilangna a dakkel a pribilehiyo daytoy nangruna ta nagbalin a nainget ti screening iti panakapili dagiti mangibagi iti pagilian.
Impanamnamana met nga uray agleppas kalpasan ti makatawen ti titulo a naipaay kadakuada ket ituloyna dagiti adbokasiyana para iti pagsayaatan ti komunidad, nangruna dagiti agtutubo.
Agserbi ni Carasi kas assistant youth leader ti delegasyon ti Pilipinas iti nasao nga aktibidad.
Ni Carasi ti sigud a panakangiwat ti Office of the Civil Defense – Cordillera ken addaan daytoy iti adbokasiya a panangital-o iti disaster risk reduction and management malaksid pay iti information and media management, edukasyon ken iti environment.
Mangrugi ti 52-day journey dagiti participants inton October 23 agingga December 13 ken ditoy nga aglugan dagiti participants iti luxurious cruise ship MS Nippon Maru nga aglayag kadagiti taaw iti Asia tapnu mapasayaat ti diplomacy skills dagitoy iti nagduduma a topiko a napateg ita iti kagimongan.
Makipaset dagiti delegasyon iti adu nga aktibidad kas iti diskusyon kadagiti napapateg nga isyu, cultural introductions, club activities, institutional visits, home-stay experience, community service ken sumanglad ti barko sadiay Japan, Malaysia, Myanmar, Singapore ken Vietnam.
Tinawen a maisaysayangkat ti SSEAYP ken daytoy ket peace-building ken cultural exchange program a narugian idi January 1974 a ponponduan ti Cabinet Office ti Japan a paspasetan ti nasurok 300 youth leaders manipud Japan ken member states ti Southeast Asia.
Maawagan met a ‘Sakabyas’ ti delegasyon ti Pilipinas ita tawen ken daytoy ket maysa a pannarita ti Maguindanao a kaipapananna ket naisangsangayan wenno baro a rupa.