Nasayaat itan ti kasasaad dagiti dua nga indibidwal a naitaray iti pagagasan kalpasan a naaksidente ti nagluganan dagitoy a truck idiay Marcos Higway, Sitio Badiwan Poblacion, Tuba Benguet.
Iti panakaiuman ti Bombo Radyo kenni Pyrel Suguaran, Investigator iti Tuba Municipal Police Station, naipasidongen iti operasyon ti agtawen iti 64 a babae gapu iti panakaipit ti makin-kannawan (right) a sakana.
Agpapaimbag metten ti anak daytoy nga agtawen met iti 33 gapu iti sinagrapna a laceration iti makin-kanigid a saka daytoy.
Saan met a nadangran wenno naan-ano ti driver daytoy nga agtawen iti 53.
Sigun iti imbestigasyon, naawanan iti preno ti truck bayat a dumaldalyasat dagitoy pasalog iti Marcos Highway.
Gapu iti dayta, indungpar ti driver ti imanmanehona a truck iti concrete barrier nu sadino, nasurok 500meters ti kaatiddog ti dinarundonna.
Iti kinapigsa iti impact, nadadael dagiti daduma a paset iti truck pakairamaman iti sango a paset daytoy.
Ti nasao a paset iti kalsada ket maibilbilang nga accident prone area rason tapno agtultuloy ti panagpalagip dagiti kameng iti pulisya nga agbalin a defensive driver.//Bombo Noveh Organo
