BAGUIO CITY – Maangay ita nga aldaw ti Biyernes, May 24 ti 2019 AIDS Candlelight Memorial, partikular sadiay People’s Park ditoy siudad ti Baguio.
Iti panakiyuman ti Bombo Radyo kenni Dr. Celia Flor Brilliantes, OIC Assistant City Health Services Officer, kinunana a ti tema ti nasao nga aktinidad ket ‘Intensifying the fight for Health and Rights’.
Kinunana a daytoy ket napatibker a kolaborasyonda kadagiti dadduma nga ahensia para iti nagkaykaysa a panagparmek iti epidemya ti HIV-AIDS infection ditoy Baguio.
Manamnama a pasetan daytoy dagiti city officials, dagiti nagduduma a maseknan nga ahensia, grupo ken organisasyon iti siudad.
Mangisayangkatda met iti maysa aldaw a libre a sexually transmitted infection-HIV testing, libre nga STI-HIV counseling ken mangiwarasda pay iti information education materials seknan iti nasao a sakit.
Innayonna a maguyguyugoy ti amin a tao iti panagsindida iti kandela sadiay People’s Park tapnu mariknada ti agsilaw ti kandela para kadagiti tattao nga addaan HIV nga agtultuloy nga agbibiag gapu iti tulong ti gobyerno, partikular ti panangipaay iti anti-retoviral tapnu pumigsa dagiti addaan ti nasao a sakit.
Kabayatanna, impetteng ni Dr. Brilliantes nga adun a tattao ti maka-ammo seknan iti HIV-AIDS ngem ti parikut ket ti panangiyaplikar dagiti tattao iti impormasyon a naadal dagitoy.
Sigun kenkuana, dumdumngeg dagiti tattao iti impormasyon seknan iti HIV-AIDS ngem iti aplikasyon ket saan nangruna dagiti young people agingga middle adult a kadawyan a maap-apektaran iti nasao nga impeksion.
– paset ti panakiyuman ti Bombo Radyo kenni Dr. Celia Flor Brilliantes, OIC Assistant City Health Services Officer ti Baguio
Maibasar iti datus ti nasao nga opisina, idi 2017 ket 61 a tattao a bukbuklen ti 4 a babbai ken 57 a lallaki ti nakarehistro iti treatment hub ditoy Baguio.
