BAGUIO CITY – Manamnama a mapilaan ti reklamo ti 26-anyos a lalaki a nangdangran iti 24-anyos a babai a kalive-in daytoy sadiay Bugallon St., West Modernsite, Aurora Hill, Baguio City.
Maibasar iti imbestigasyon, kasangsangpet dagiti aglive-in partner iti pagnanaedanda manipud iti trabaho dagitoy idi nagdawat ti biktima ti kwarta manipud iti suspek a pangbayadna kuma iti bills ken daduma pay a bayadan dagitoy.
Ngem nakaunget ti suspek, rason a pinagsasao-anna ti dakes ti biktima.
Nakaunget met ti biktima nu sadino tinungpana ti suspek ngem nagibales daytoy nu sadino binekkelna ti biktima.
Saan pay a napnek ti suspek gapu ta dinanogna ti rupa ken ulo ti biktima sakbay a binugbogna ti namin-dua a daras ti biktima ken tinupraan daytoy.
Dagus met nga impakaammo ti biktima ti napasamak kenkuana iti kaasitgan nga opisina ti pulisya iti siudad rason a nakemmeg ti suspek.
Ti inaramid ti 26-anyos a lalaki ket panaglabsing iti Republic Act 9262 wenno Violence Against Women and their Children.//Bombo Jez Lapizar
