Sumangsango iti kaso nga obstruction of justice ken direct assault complaints dagiti dua pulo ket siyam a miyembro ti Kingdom of Jesus Christ kalpasan a dinangranda dagiti innem a pulo a police officers bayat ti pannakaiserbi ti warrant of arrest kontra kenni Pastor Apollo Quiboloy.
Daytoy ti kinuna ni Police Major Catherine dela Rey, Spokesperson ti Police Regional Office (PRO) 11 iti press conference.
Innayon ti nasao nga opisyal a madama nga agpapaimbag dagiti innem a pulo a pulis manipud iti nasagrapda a dunor.
Inaklon met ni PMaj. Rey nga adda ti dua a miyembro ti Kingdom of Jesus Christ a nadangran metlaeng bayat ti operasyon ngem inasikaso daytoy dagiti otoridad.
Immunan a nangipila iti reklamo dagiti sumagmamano a miyembro ti Kingdom of Jesus Christ kalpasan a maatap a nadangran dagitoy bayat ti police operation iti 30-hectare compound ni Quiboloy idiay Davao City.
Nainget met a pinaglibakan ti Philippine National Police ti nasao nga alegasyon.
Iti agdama ket nakabantay pailaeng dagiti ado a kameng ti pulisya iti uneg ti compound ti Kingdom of Jesus Christ gapu ta mamatida nga adda ditoy ni Pastor Quiboloy.
Ita nga aldaw ti maika-innem nga aldaw a panagbantay dagiti pulisya iti nasao a compound gapu ta nangrugi ti police operation idi Sabado.
