Natiliw ti policewoman ti killer wenno nangpapatay iti amana kalpasan ti dua pulo ket lima a tawen.
Daytoy ni Gislayne, 36-anyos ken maysa ita nga abogado ken police.
Sigun kenni Gislayne, nadadael ti pamilya daytoy gapu laeng iti krimen rason nga inkarina iti biagna a tiliwena ti suspek iti pammapatay iti daydi tatangna.
Kas inauna nga anak, kinasapulanna a tulongan ti nanangna iti panangaywan kadagiti kakabsat daytoy kasta met dagiti house chores.
Iti baet dayta, saan a binaybay-an ni Gislayne ti panagadalna gapu ta nakaturpos daytoy kas abogado agingga idi tawen 2022.
Nupay kasta, imbatina ti kinaabogadona tapno agbalin a policewoman.
Idi laeng Setyembre 25, natungpal ti arapaapna a maipaayan ti hustisya ti ipupusay daydi amana.
Natiliw ni Gislayne ken ti bunggoyna ni Raimundo a naglemmeng iti maysa a farm idiay Nova Cidade region.
Inaklonna pay a saan a nalapdan daytoy nga agsangit gapu ta naimatangana a nakaposas ken naibalud ti nangpapatay iti daydi tatangna.
Idi February 16, 1999, napaltogan ken napatay ni Givaldo José Vicente de Deus iti maysa a bar idiay Boa Vista, Brazil gapu laeng iti utang.
