Pakabuklan a 37 a wanted persons ti inarestar ti kapulisan iti rehion cordillera kabayatan ti makalawas a panakaisayangkat dagiti operasyon kadagiti nagduduma a probinsya.
Iti nasao a bilang, kaadwan ti naarestar ti Baguio City Police Office (BCPO) a dumanon iti 14;sinaruno daytoy iti Benguet Police Provincial Office a nakaarestar iti 10; sag-tallo met ti naarestar dagiti police provincial offices iti Apayao, Ifugao ken Mountain Province; bayat a sag-dua met ti naarestar ti Abra ken Kalinga.
Siam (9) manipud kadagiti amin a natiliw ket naibilang a Most Wanted Persons— maysa (1) iti regional level, pito (7) iti provincial level, ken maysa (1) iti municipal level.
Kabayatanna, sigun paylaeng iti Police Regional office-Cordillera, nakailista dagitoy iti zero crime incidents iti 57 a munsipyo iti Cordillera.
Pakairaman daytoy iti 24 a munisipyo idiay Abra, siam (9) idiay Ifugao, walo (8) idiay Mountain Province,innem (6) idiay Apayao,ken sag-lima(5) iti Benguet ken Kalinga.
Dagiti met istasyon ti Baguio City Police Office (BCPO) nga addaan zero crime incidents ket pakairamanan ti Police Stations 4, 6 ken 8.
Daytoy ket resulta ti agtultuloy a panakapasayaat ti police visibility, regular a panakaisayangkat dagiti patrolya kasta metten ti panakikoordinarda kadagiti lokal a gobyerno ken kadagiti komunidad.//Bombo Noveh Organo
