BAGUIO CITY – Agarup 38 a pamilya wenno 169 nga indibidual iti Baguio City ti naapektaran iti panagdalapos ni Super Typhoon Julian kas maibasar iti kaudian a datus ti City Disaster Risk Reduction and Management Office.
Nairekord pay ti walo nga insidente ti panagreggaay partikular idiay Barangay Irisan, Campo Filipino ken Dominican Hill.
Awan met ti nailista nga insidente ti panaglayos ngem sumagmamano a paset ti siudad kas iti Balacbac Road, Sto. Tomas Proper, Upper Magsaysay, Lower Magsaysay, AZCKO ken Padre Zamora ti nakapasar iti temporaryo a panagpukaw ti suplay ti kuryente.
Natumba dagiti uppat a kayo iti paset ti Suello Village, Aurora Hill, Lower Rock Quarry, Teachers Camp ken Baguio Convention Center.
Iti baet daytoy, awan met ti nailista a kaso ti ipupusay ken pannakadangran.
Nangipaay met dagiti maseknan nga opisina iti kaskenan a tulong kadagiti naapektaran a pamilya.
