BAGUIO CITY – Nakemmeg ti maysa a drug pusher ken dua a kakomplotna sadiay Purok 4, Poliwes, siudad ti Baguio iti naisayangkat a buy-bust operation idi kalman.
Nabigbig dagitoy a da John Charlie Mutuc, 26-anyos, baro, residente ti Kias, Baguio City; Michael Llamas Evangelista, 2019-anyos, estudyante, residente ti Tipas, Taguig City ken Dronie Masdo, 39-anyos, driver, residente ti Wawa, Taguig City.
Immuna a nakemmeg ni Mutuc kalpasan nga inlakona iti operatiba ti PDEA-Cordillera ti dua a pakete ti maatap a shabu nga agdagsen iti 50 a gramo nga aggatad ti P340,000.
Nupay kasta, kalpasan ti operasyon ket inaklon ni Mutuc nga adda pay ti kadwana.
Dagus met a nangisayangkat dagiti otoridad iti interdiction operation a nagresulta iti panakakemmeg dagiti dua a turista.
Nakumpiskar pay kenni Masdo ti maysa a pakete ti maatap a shabu nga agdagsen iti 0.1 a gramo manipud iti cellphone daytoy.
Sigun iti PDEA-Cordillera, naduktalan ti illegal drug activities dagiti tallo ditoy siudad a nagresulta iti nasao nga operasyon.
Kabayatanna, nakemmeg metlaeng ni Faad Solog Basman, 24-anyos ken residente ti Crystal Cave, Bakakeng Central, Baguio City iti naisayangkat nga operasyon kontra kenkuana.
Nakumpiskar kenni Basman ti dua a pakete ti maatap a shabu nga agdagsen iti 10 a gramo ken aggatad ti P68,000.
Sumangsango metten dagiti uppat nga indibidual iti kaso a panaglabsing iti RA 9165 wenno ti Comprehensive Dangerous Drugs Act of 2002.
