Dumanon iti uppat a pamilya a buklen ti 19 nga indibidual sadiay Camp 7, Kennon Road, Baguio City ti nag-pre-emptive evacuation gapu iti panagtennag ti bato sadiay.
Karaman a nagbakwit ti agtagikua iti balay a napandagan iti dakkel a bato.
Iti pannakiuman ti Bombo Radyo kenni Angelina Ramos, barangay kapitan sadiay, kinunana a daytoy ti umuna a gundaway a panagtennag ti dadakkel a bato manipud iti bantay.
Sigun kenkuana, nangrugi laeng ti panagtennag ti batbato sadiay idi nirugian ti maysa private company ti panangdevelop ken panag-excavate iti bantay.
Maibasar kadagiti agwarwaras a damag ti nasao a proyekto ket maar-aramid kas sementeryo ngem naipasardeng ti operasyon gapu iti saan a natalged ti implentasyon ti proyekto dagitoy.
Kabayatanna, iti pannakiuman ti Bombo Radyo kenni Engr. Charles Carame, Officer ti City Disaster Risk Reduction Council, kinunana a pasado ala una iti pangaldaw a nagtennag ti umuna a dakkel a bato a nangpandag iti maysa a kotse ken ti maysa a balay.
Nupay kasta, 30 laeng a minutos ti napalabas ket simmaruno met a nagtulid ti mas dakdakkel pay a bato.
Awan met ti nadangran iti nasao nga insidente.
Gapu iti dayta, daytoy ti nakaro a nailista iti siudad ti Baguio ita a panagtutudo.
Kagiddan dayta, nagpalagip met dagitoy iti publiko a saanda a magna iti Kennon Road agsipud ta nakarekep daytoy kadagiti motorista a saan a residente sadiay.
Manarimaan latta ti monitoring ken panagbantay dagitoy iti nasao a lugar.//Bombo Noveh Organo
