BAGUIO CITY – Inreklamo ti maysa a menor de edad ti maysa a lalaki gapu iti maatap a panangbastos daytoy kenkuana sadiay Wright Park, Lualhati, Baguio City idi rabii kalman a nagresulta iti panakakemmeg ti nasao a lalaki ken tallo a kadwa daytoy gapu iti panagaramatda iti iligal a droga.
Nabigbig ti naireklamo a ni Sylvester Fermelan Cario, 18-anyos, ALS student ken residente ti Gibraltar Road, Baguio City.
Sigun iti pulisya, nag-iinom iti arak ti biktima, ti suspek ken dagiti pagayam ti suspek sadiay Wright Park.
Kalpasanna, pinanggep ni Cario a gammatan wenno molestiya-en ti balasitang ngem nakataray daytoy ken naglugan iti taxi sakbay a nagkamang iti BCPO-Station 3.
Naamuan nga impilit ti suspek nga aginom ken agaramat iti marijuana ti biktima.
Dagus met a nagresponde dagiti otoridad ken ditoy a nadanunan ken naaktuwanda ti panag-aramat ni Cario ken dagiti kakadwana iti iligal a droga, partikular ti marijauana.
Nabigbig dagiti kakadwa ni Cario a da Renz Agbuya Cruz, 25-anyos, baro, phony boy, residente ti Maria Basa, Pacdal ken ti dua a menor de edad a 16-anyos ken 15-anyos.
Nakumpiskar manipud kenni Cruz ti maysa a pakete ti maatap a napagango a marijuana.
Sumango ita iti kaso a panaglabsing iti RA 9165 wenno Comprehensive Dangerous Drugs Act of 2002 dagiti nasao a suspek bayat a kanayonan a kaso nga acts of lasciviousness ti suspek ani Cario.
