Agarup 40% agingga 50% a compound ti Kingdom of Jesus Christ (KOJC) idiay Davao City ti sinukimat ti Philippine National Police ngem saanda a nakita Pastor Apollo Quiboloy.
Daytoy ti kinuna ni PNP spokesperson Police Colonel Jean Fajardo babaen iti impormasyon nga impaay ni Police Regional Office (PRO) 11 chief Police Brigadier General Nicolas Torre III.
Dinakamat ni Fajardo, ado pay a building ti masukimat gapu ta 30-hectare ti kalawa ti compound ni Pastor Quiboloy.
Sigun pay iti nasao nga opisyal, kitkitaen dagiti otoridad ti underground facility a naaramid iti napuskol a bato ken metal.
Ita nga aldaw ti maika-piton nga aldaw a panagsukimat dagiti kameng ti pulisya iti compound ni Pastor Quiboloy.
Panggep dagiti otoridad nga iserbi ti warrant of arrest kontra kenni Quiboloy gapu iti maatap a panaglabsingna iti Special Protection of Children Against Abuse, Exploitation, and Discrimination Act, Human Trafficking ken dadduma pay.
Namin-ado metten a daras a pinaglibakan ni Quiboloy dagiti alegasyon kontra kenkuana.
