BAGUIO CITY – Agtultuloy ti panangisayangkat dagiti personnel ti Baguio City Police Office iti Simultaneous Anti-Criminality and Law Enforcement Operations (SACLEO) a nagresulta iti panakatiliw ti pakabuklan a 47 nga indibidual iti lima nga aldaw a SACLEO idi ita a lawas.
Maisaysayangkat ti SACLEO kas maysa nga all-out police operation kontra kadagiti illegal drug personalities, most wanted persons ken dagiti addaan ti loose firearms.
Nagresulta ti kaudian a SACLEO iti panakatiliw ti 32 a wanted persons, pakairamanan dagiti 10 a nailista kas Top Most Wanted Persons kalpasan a naiserbi ti warrants of arrest dagitoy gapu iti nagduduma a kasoda kas iti estafa, panagtakaw, attempted homicide, panagrames ken panaglabsing kadagiti kaso nga Anti-Child Abuse, Anti-Violence Against Women and their Children, Cybercrime Prevention Act, Anti-Carnapping Law ken dadduma pay.
Pakabuklan met nga 11 a drug personalities a bukbuklen ti innem a High Value Individuals ken uppat nga Street Level Individuals ti natiliw dagiti otoridad kadagiti naisayangkat a buy-bust operations a nakakumpiskaran ti 15.8 a gramo ti mapapati a shabu ken 20 a gramo ti marijuana nga aggatad amin ti nasurok P100-K.
Naipaayan met ti citation tickets ti uppat a drivers kalpasan a naduktalan ti kolorum nga operasyonda kabayatan ti anti-colorum operation ditoy siudad.
Boluntaryo pay a naisuko iti pulisya ti uppat a paltog kas paset ti panakikaykaysa ti komunidad iti kampanya ti pulisya kontra kadagiti loose firearms kayatan dagiti information drive iti komunidad.
Impannakkel met ni BCPO City Director PCOL Glenn Lonogan a ti nasao nga accomplishments dagiti pulis iti siudad kagiddan ti panangkunana a saan nga agbaligi ti SACLEO no awan ti consistency kadagiti plano ken no awan ti teamwork dagiti amin nga yunit ti pulisya.
