BAGUIO CITY – Agtaltalinaed a high-risk wenno nangato ti risgo iti African Swine Fever (ASF) kadagiti munisipyo ti La Trinidad, Tuba, Itogon, Kabayan ken Bokod iti probinsia ti Benguet.
Gapu iti daytoy, kidkiddawen ken iyap-apela ti Benguet Provincial Veterinary Office ti panagtungpal dagiti umili, nangruna kadagiti agtartaraken iti baboy kadagiti paglintegan tapnu maliklikan ti ad-adda a panagwaras ti ASF iti dadduma a munisipyo ken babbabarangay iti probinsia.
Sigun kenni Povincial Veterinarian Dr. Miriam Tiongan, pagparparikutanda ita dagiti mangilaklako kadagiti tarakenda a sibibiag a baboy kadagiti dadduma a munisipyo.
Kinunana a daytoy ket gaputa saan a sigurado no awanan iti ASF dagiti baboy nangruna ta saan dagitoy a dumaldalan iti umno a proseso ken awanan iti kaskenan a dokumento dagitoy.
Inyapelana pay kadagiti umili nga idalanda dagiti angkaten wenno gatangenda a baboy kadagiti animal quarantine checkpoints iti probinsia tapnu maipanamnama ti kinatalged dagitoy ken saanen a manayonan ti kaso ti ASF iti Benguet.
