BAGUIO CITY – Dumanon iti lima ribo a plaka ken RFID stickers dagiti motorsiklo a nairehistro ditoy Cordillera Region idi 2018 ti inwaras ti La kadagiti maseknan a dealers ita nga aldaw.
Nupay kasta, isimsimpa paylaeng ti Land Transportation Office (LTO) – Cordillera ti schedule ti panagala dagiti maseknan a motorista iti baro a plaka dagitoy gapu kadagiti restrictions ita a pandemya ken kadagiti dealers a gimmatanganda iti motorsiklo ti pagalaandanto iti baro a plakada.
Sigun kenni LTO – Cordillera regional director Francis Ray Almora, maitunos daytoy iti Republic Act 11235 wenno ti Motorcycle Crime Prevention Act a nangimandato iti panakasukat dagiti plaka ken panakaikabil dagiti baro a features kadagitoy malaksid pay iti panakaikabil ti RFID sticker iti sangwanan ti motorsiklo.
Impannakkelna nga addaan iti security features dagiti kabarbaro a plaka dagiti motorsiklo isut gapuna a narigat dagitoy a mapeke.
Dinakamatna nga iti rehion ket adda ti color coding kadagiti plaka dagiti motorsiklo, no sadino, iti Benguet ket agmaris ti pink ti ngato a paset ti motorcycle plate.
Inlawlawag pay ni Almora a naiduma ti it-ited ti LTO nga RFID sticker kadagiti motorista manipud iti RFID sticker a maar-aramat para iti cashless transaction kadagiti expressways.
Sigun kenkuana, sumaruno a maiwaras dagiti baro a plaka dagiti motorsiklo iti rehion a nagrehistro idi 2016, 2017 ken 2019.
