BAGUIO CITY – Dumanon iti 57 a sigud a miembro ti Underground Mass Movement Organization ti nangisanod iti panangsuportarda iti Communist Party of the Philippines-New People’s Army-National Democratic Front (CPP-NPA-NDF).
Pinaneknekanda ti panangsuportarda iti gobyerno babaen ti maysa a seremonya sadiay Sumadel, Tadian, Mountain Province.
Insapatada ti panagtungpalda kadagiti linteg ken ti saanda a panagsubli iti sigud a panagbiagda kas rebelde.
Iti mensahe ni PCol. Ruben Andiso, dadaulo ti Mountain Province Police Provincial Office, kinunana a ti aktibidad ket bunga dagiti panagsakripisyo ken panaggaed tapnu malawlawagan ken maiyawid dagiti kailyan a naallilaw a mangsuportar iti armado a rebelyon ti CPP-NPA-NDF.
Iti met mensahe ni Lt.Col. Ricardo Garcia, dinayawna ti nagtipon a pwersa ti militar, pulis, lokal a gobyerno ti Mountain Province ken dagiti national line agencies gapu iti panagkaykaysa dagitoy tapnu mamintinir ti linak ken kappia sadiay ken iti panakaipaay ti gundaway kadagiti sigud a miembro ti underground movement nga agsubli iti sidong ti gobyerno.
Kiniddawna pay ti tulong dagiti surrenderees babaen iti panangawisda met kadagiti dadduma pay nga adda iti impluwensia ti CPP-NPA-NDF iti panagsuko dagitoy.
Nagserbi pay a kangrunaan a tampok iti aktibidad ti pananguram kadagiti bandera dagiti komunista kas simbolo ti sapata dagiti surrenderees a panagsuportarda iti gobyerno ken ti saandan a panakikappeng iti aniaman nga underground movement wenno aniaman a komunista a grupo.
