Pinaneknekan ni Irene Buyuccan, agtawen iti 59, a ti tawen ket saan a lapped iti pananggun-od iti balligi kalpasan a nabigbig a Female Champion iti Nueva Ecija Marathon 2026.
Napagballigianna ti atidog a bypass road a mangsaksaklaw kadagiti munisipyu iti Guimba ken Cuyapo, nu sadinno impakitana ti natibker, disiplina, ken determinasion iti pakabuklan a karerana.
Kadua ti Ifugao Haggiyo Trail Runners ken dagiti gagayyem, siraragsak a binallasiw ni Buyuccan ti finish line ken rinambakanna ti naidumduma a panagballigina.
Malaksid iti panagkampeonna iti kategoria iti babai, naawatna metlaeng ti Toughest Runner Award ken nabigbig kas Age Group (AG) Winner.
Mabigbigbig ni Buyuccan kas inspirasion iti adu a runner gapu iti kinagagar, dedikasion, ken agtultuloy a panagayatna iti isport a panagtaray, a mangpaneknek a ti edad ket saan a rukod ti abilidad a manggun-od iti balligi.
