BAGUIO CITY – Sumangsango kadagiti kaso a falsification of documents ken panaglabsing iti RA 11332 wenno Mandatory Reporting of Notifiable Diseases and Health Events of Public Health Concern Act ti innem nga indibidual a nagturong ditoy siudad ti Baguio idi agsapa kalman.
Nabigbig dagitoy a da Wendel Delos Santos Jr., 19; Ryan Quindoza, 21, agpada a greenhouse installers ken residente ti Tulian Catanuan, Quezon Province; ni Rowel Ponelas, 20, greenhouse installer ken residente ti Calbayog City, Samar; ni Arman Margazo, 25, greenhouse installer ken residente ti Kalibo, Aklan; ni Richard Anoñuevo, 33, company driver ken greenhouse installer ken residente ti Palumlum, Alfonso, Cavite; ken ni Virgilio Pompac, 33, company driver ken greenhouse installer ken residente ti Bukal, Silang, Cavite.
Maibasar iti report, kabayatan ti kaadda dagiti innem nga indibidual iti Baguio Convention Center Triage Facility ket nadiskobre ti maysa a nars dagiti peke a swab test result dagitoy.
Dagus nga inreport ti nars ti nasao a banag iti istasyon ti Baguio City Police Office – Marcos Highway Police Station para iti kanayonan nga imbestigasyon.
Kabayatan ti imbestigasyon dagiti pulis ket naduktalan nga inyawat laeng ti gwardia ti kompanya dagiti innem dagiti nasao a peke a swab test results kadakuada iti pammilin ti employer dagitoy.
