BAGUIO CITY – Nagpositibo iti COVID-19 dagiti trainees ti Bureau of Fire Protection (BFP) a maipaspasidong iti panagsanay ditoy siudad ti Baguio.
Sigun kenni Mayor Benjamin Magalong, 64 a trainees ti BFP ti nagpositibo iti COVID-19 malaksid pay iti lima a tactical officers ti BFP.
Kinunana a posible a ngumato pay ti nasao a bilang gaputa manarimaan ti panakaipasidong dagiti dadduma a trainees ken personnel ti BFP iti swab test.
Dinakamatna a naisayangkat ti panagsanay dagiti nasao a fire operatives iti training site ti BFP sadiay Barangay Dontogan.
Innayonna a nalawag a linabsing ti BFP dagiti minimum public health standards a nagresulta iti nasao nga outbreak ti COVID-19.
Sigun pay kenkuana, saan a nagtungpal ti ahensia iti pammilinna idi pay June 12 a panakasuspindir amin a panagsanay ti PNP ken BFP a maisaysayangkat ditoy siudad.
Manarimaan metten ti imbestigasyon iti itataud ti nasao a clustering dagiti kaso ti COVID-19 ken dinakamatna a posible a sumango iti kaso nga administratibo dagiti maduktalan a naglabsing iti health protocols.
Maipalagip a sinuspindir ni Mayor Magalong amin a panagsanay ti PNP ken BFP ditoy siudad kasaruno ti namin dua nga outbreak ti COVID-19 iti nagsina a training center ti PNP, no sadino, nasurok a 120 a police officers a maipaspasidong iti panagsanay ti nagpositibo iti COVID-19 ken dagiti outbreak ket gapu iti panaglabsing iti health and safety protocols.
