BAGUIO CITY – Nakemmeg ti pito nga indibidual pakairamanan ti dua a benepisario ti Social Amelioration Program (SAP) iti nagsina nga operasion kontra iti iligal a sugal sadiay Tabuk City, Kalinga idi Mayo 9.
Umuna a nakemmeg ni Ireneo Regaton Dumayas, 42-anyos, balo, benepisario ti SAP ken residente ti Appas, Tabuk City, Kalinga.
Naaktuan dagiti otoridad ti panagay-ayam daytoy iti “Pusoy” bayat a nakalibas dagiti kakadwa daytoy a nagsugal.
Nakumpiskar manipud kenkuana ti P330 a taya ken maysa a set ti baraha ken naiturong ti suspek ken dagiti ebidensia iti Tabuk City Police Station.
Kabayatanna, nakemmeg iti maikadua nga operasion ti innem nga indibidual sadiay Purok 5, Bulanao, Tabuk City, Kalinga.
Nabigbig dagitoy a da Vivian Luminio, 22-anyos, SAP beneficiary; Jacquelyn Acosta, Myrna Frias, Sherwin Simeon, Lea Alvarez, ken Antonio Luminio nga agpapada nga addaan iti legal nga edad.
Naaktuan dagitoy nga agay-ay-ayam iti pusoy iti balay ti maysa kadagiti suspek.
Nakumpiskar manipud kadakuada ti P1,215 a taya ken nagduduma a baraha.
Sumangsango dagiti suspek iti kaso a panaglabsing iti Presidential Decree 1602 wenno “Prescribing Stiffer Penalties on Illegal Gambling”.
