BAGUIO CITY – Nakemmeg ti walo nga indibidual gapu iti kaso dagitoy nga iligal a panagsugal ken iligal a panagputed ti kayo ditoy rehion Cordillera.
Maibasar iti report, nakemmeg dagiti innem a lallaki gapu iti panagay-ayamda iti dice wenno dado sadiay Barikir, Zone 5, Bangued, Abra.
Nabigbig dagitoy a da Mark Ferrari Belleza, Jun-jun Barroga, Juerns Jervin Daria, Dionisio Bargas, Rene Tarinay ken Thelmo Brillantes.
Nakumpiskar kadakuada ti P1,140 a taya ken dagiti banag nga ar-aramaten dagitoy iti nasao a sugal.
Kabayatana, nakemmeg met ti dua a laborers iti anti-illegal logging operation nga insayangkat dagiti otoridad sadiay Pua, Balintaugan, Bauko, Mt. Province.
Nabigbig dagitoy a da Boking Umaney, 28-anyos ken Augustus Tanglod, 24-anyos, agpada a residente ti Ankileng, Sagada, Mt. Province.
Nakumpiskar kadakuada ti maysa a chainsaw ken sumagmamano a pidaso ti naragadi a kaykayo.
Naiturong dagiti nakemmeg nga indibidual ken dagiti nakumpiskar a banag iti estasyon ti pulisya ken naipilan ti kaskenan a kaso kontra kadagitoy.
