BAGUIO CITY – Manamnama a maaddaanen dagiti personnel ti Public Order and Safety Division (POSD) iti body cameras inton umay a Disyembre iti agdama a tawen.
Sigun kenni POSD Deputy Head Daryl Kim Longid, manarimaan ti koordinasyonda kadagiti pribado a kompanya para iti pannakagatang dagiti body cameras.
Kinunana a dumanon iti 80 a units ti body cameras ti kiniddawda iti lokal a gobierno nga aramaten dagiti personnel.
Dinakamat pay ni Longid a dagiti body cameras ket maikonektar iti command center ti siudad gaputta addaan daytoy iti live streaming capability.
Innayunna a babaen iti daytoy ket makita dagiti garaw dagiti personnel para iti transparency ti serbisyo dagitoy.
Immunan a naisanod ti koordinasyonda iti maysa a supplier ti body cameras kalpasan kadagiti isyu a sinango dagitoy.
