Naibalud dagiti siyam nga indibidual, pakairamanan ti agtagikua iti ski resort hotel gapu iti napasamak nga uram a nakatayan dagiti pito pulo ket innem nga indibidual ken nakadangran kadagiti dinosdosena nga indibidual sadiay Western Turkey.
Sigun kenni Interior Minister Ali Yerlikaya, naiyawaten ti bangkay dagiti uppat a pulo ket lima a biktima kadagiti pamilyada, bayat manarimaan paylaeng ti DNA tests kadagiti nabatbati pay a bangkay iti forensic institute.
Inyebkas met ti nasao a hotel ti pannakipagladingitda kadagiti pamilya dagiti biktima ken inkarida a makikoordinar dagitoy iti imbestigasyon.
Ti 12-storey hotel, ket naglaon iti 238 a registered guests idi napasamak ti nasao nga uram.
Mapapati met a nangrugi ti uram iti restaurant iti uneg ti hotel iti oras ti alas tres trenta iti agsapa a nangitunda iti panagramaram daytoy.
Kayabayatanna, indeklara ni President Tayyip Erdogan idi kalman kas aldaw ti national mourning kasaruno ti nasao a trahedya.
