BAGUIO CITY – Nakemmeg ti dua a drug personalities iti nagsina a drug sting operation ti Baguio City Police Office itay kanikadua.
Babaen iti nagtipon a pwersa ti BCPO Irisan Police Station, PDEU Benguet, RPDEU, RIU- 14, CDEU-Baguio, CIU-Baguio, ken RACU-COR ket nakemmeg sadiay Sta Lucia Asin Rd., Baguio City ni Christian Caluza y Lopina, 26-anyos, electrician ken residente ti Outlook Drive, Baguio City.
Nailista ni Caluza kas High Value Individual ti PROCOR ken immunan a tiniliw ti Itogon MPS idi 2019.
Nakumpiskar manipud kenkuana ti maysa a pakete ti maatap a shabu nga agdagsen iti .5 a gramo nga aggatad iti P3,400, maysa a yunit ti cellphone ken buy-bust money.
Kabayatanna, nakemmeg met sadiay Purok 18, Irisan, Baguio City ni Mia Velasquez, 25-anyos ken residente ti Camp 7, Kias Baguio City.
Nailista ni Velasquez kas Street Level Individual.
Nakumpiskar manipud kenkuana ti kapada a kontrabando.
Agpada a naka-detain ti dua a suspek iti BCPO Irisan Custodial Facility bayat a maisagsagana ti kaso a panaglabsing iti RA 9165 wenno ti “Comprehensive Dangerous Drugs Act of 2002” a maipila kontra kadakuada.
