BAGUIO CITY – Naireklamo iti kaso nga estafa ken theft ti maysa a van driver kalpasan nga intarayna ti nasurok P200-K ti gatadna nga alikamen ti maysa a pamilya manipud Cavite a nagbakasyon iti Baguio City idi Oktobre 24.
Maibasar iti imbestigasyon, nangipablaak ti mensahe iti social ti maysa kadagiti biktima nga agsapsapulda ti “van for rent” tapno agbakasyonda iti siyudad.
Nabasa met daytoy ti facebook user/suspek a ni Matthew Cutanda Matta, driver ti Nissan Urvan nga addaan plate number NEQ 3573 ken residente ti Cavite, rason a naadaanda ti transaksyon iti biktima.
Napagtulaganda ti P15-K para iti tallo nga aldaw ken dua a rabii a panagbiyahe dagiti biktima manipud Cavite paturong iti Baguio City.
Nangipatulog ti maysa kadagiti biktima ti P10-K kas down payment.
Nagtulnog met ti suspek nu sadino sinukkona dagiti agkapamilya sadiay Cavite ken nagbiyaheda paturong iti Baguio City.
Kabayatan ti panag-tour dagiti biktima, sumagmamano kadagitoy ti nagdissaag iti Baguio City Public Market bayat a nagturong met dagiti dadduma iti maysa a mall.
Idi nalpas a nagpurchase dagiti complainants, inawaganna ti suspek, ngem iti maikatlo a daras ket saanen a makontak.
Sigun kadagiti biktima, amin dagiti alikamen dagitoy kas ti ATM cards, bags, gadgets, cash, jewelries, IDs ken dadduma pay ket naibati iti uneg ti lugan nga imanmaneho ti suspek.
Naduktalan a nasurok P200-K ti gatad dagiti natakaw nga alikamen dagiti biktima.
Nakikoordinar metten ti Baguio City Police Office kadagiti nagduduma nga istasyon ti pulisya tapno matiliw ti suspek.
