Agtaltalinaed a maysa kadagiti parikut ti lokal a gobyerno ti siudad ti Baguio ti kinakurang iti pondo tapno matustusan dagiti pagkasapulan ti nagduduma nga sektor.
Iti panakiuman ti Bombo Radyo kenni Councilor Elmer Datuin, pabor daytoy iti maisaksakad nga ordinansa para iti panakaipaay ti burial assistance partikular kadagiti empleyado ti gobyerno laketdi adda ti umdas a pondo.
Nupay kasta, inlawlawag ni Councilor Datuin a masapol ti naan-anay a panangbalanse iti panangipaay kadagiti benepisyo gapu ta adu pay dagiti sabali a pakaseknan kadagiti nagduduma a sektor a nasken nga ipangruna a risuten kas ti social services nu sadino, adu dagiti agkasapulan ti livelihood assistance, financial assistance, medical assistance, ken daduma pay.
Innayonna a kagiddan ti panangbigbeg kadagiti panagregget dagiti empleyado ti gobyerno a mabalin nga agnumar iti nasao a benepisyo, napateg metlaeng a panunuten ti pagsayaatan dagiti kangrunaan nga agkasapulan ti tulong.//Rob Dominguez
