Nagkiddawen iti dispensar wenno pammakawan ti maysa kadagiti nalalatak a social media influencers a ni Deo Balbuena wenno nalatlatak iti nagan a Diwata gapu iti kontrobersya seknan iti panangipakitana iti naawagan a “cultural insensitivity” iti maysa kadagiti video a naipablaak.
Iti facebook post daytoy,nakalanad ti panangbigbig ni Diwata a ti pagaramat iti tradisyunal a kawes iti saan nga umno a wagas ken panang-awag iti daytoy kas “costume” ket maysa a dakkel a kamali.
Inaklon ti nasao a social media influencer a nagpaturay daytoy iti nariknana a “pusong bata” ken nalaos a ragsakna gapu iti kaunaan a gundaway a panagturong daytoy iti Baguio City.
Nupay kasta, nakalanad iti post daytoy a ti napasamak ket agserbi a palagip para iti publiko a ti kultura, tradisyon, ken pakabigbigan iti maysa a lugar ken dagiti Pilipino ket rumbeng nga ipaayan iti nangato a panagraem.
Kagiddan dayta, impettengna a saanna nga intensyon a bastusin wenno tagibassiten ti kultura dagiti taga-Cordillera partikular dagiti taga-Benguet.
Maipalagip a nakaawat iti pammabalaw ni Diwata manipod iti publiko partikular kadagiti Cordillerans gapu iti misrepresentation daytoy iti tradisyunal a kawes iti nadakamat a rehion.//Bombo Rob Dominguez
https://www.facebook.com/photo?fbid=596748966520104&set=a.250323067829364
