Saan a lapdan ti Malakanyang ti publiko nangruna dagiti mangsupsuporta kenni sigud a President Rodrigo Duterte a mangiruar iti kaririknada kasaruno ti pannakaarestar ti sigud a Presidente.
Daytoy ti kinuna ni Palace Press Officer Undersecretary Atty. Claire Castro iti press briefing ita nga aldaw.
Kinuna ni Castro a karbengan dagiti supporters a makipagrikna ken makisimpatya iti sigud a Presidente.
Sigun pay kenni Castro, saanen a kasapulan ti loyalty check kadagiti pulis ken militar kasaruno ti pannakaarestar ni Duterte gapu iti crime against humanity a sangsangoenna iti International Criminal Court.
”Loyalty check? Wala po, kampante po ang Pangulo. Ang ginawa naman po ng administrasyon ay naaayon sa batas,” impetteng ni Castro.
Inyunay-unay manen ti nasao nga opisyal a ti inaramid ti gobyerno ti Pilipinas ket maitunos iti linteg.
Immunan a kinuna dagiti opisyal nga awanen ti hurisdiksyon ti ICC iti Pilipinas ngem inlawlawagda nga indalan ti ICC ti warrant of arrest iti Interpol rason a saan a mapagkedkedan ti gobyerno ti Pilipinas ti kiddaw ti Interpol.
Sigun kadagiti opisyal, ti Pilipinas ket miembro ti Interpol ken tinulongan ti Interpol ti Pilipinas a nangtiliw kadagiti Pilipino nga aglemlemmeng iti dadduma a pagilian gapu iti krimen ken kaso a nakairamanan dagitoy iti pagilian.
Immuna metten nga impeksa ni President Ferdinand Marcos Jr. a nu saanna a patgan ti kiddaw ti Interpol a mangtiliw kenni sigud a President Duterte ket posible a saan met a tumulong ti Interpol iti Pilipinas a mangtiliw kadagiti Pilipino nga addaan iti kaso nga aglemlemmeng iti dadduma a pagilian.
