Nakemmeg ti dua a lallaki kabayatan ti naipatungpal a drug buy-bust operation sadiay P. Burgos Barangay, Baguio City pasado alas onse ti rabii idi kalman.
Dagiti maatap a drug pusher ket pakairamanan iti lalaki nga agtawen iti 31, single, laborer, tubo iti Barlig, Mt. Province ken residente iti agdama idiay Lower Magsaysay, kadwana ti maysa metlaeng a lalaki nga agtawen met iti 25, single, tubo iti Sagada, Mt. Province, ken residente iti agdama idiay Guisad Proper,Baguio City.
Iti impormasyon a naala iti Bombo Radyo manipod kadagiti kameng iti pulisya, nangilako dagiti suspek iti maatap a marijuana leaves nga agdagsen iti agarop 9.25 grams kadagiti otoridad.
Malaksid iti dayta, nakakumpiskar metlaeng dagiti otoridad iti agarop 3.88 grams iti metlaeng maatap a marijuana leaves.
Iti pakabuklan, dumanon iti P1,965.60 ti gatad dagiti nakumpiskar a maatap a marijuana leaves.
Iti agdama,addan dagiti suspect iti kustodiya dagiti otoridad ken sumango iti reklamo a panaglabsing iti Republic Act 9165 wenno ti Comprehensive Dangerous Drugs Act of 2002.
Ti drug buy-bust operation ket insayangkat dagiti kameng ti Baguio City Police Office-Police Station 7 ken dadduma pay a unit ti BCPO ken ti PDEA-CAR.//Bombo Genzel Depayso
