Pimmusay ti maysa nga indibidual ken nadangran ti maysa pay iti insidente ti pammaltog idiay Tayum, Abra idi laeng Lunes, Abril baente uno.
Nabigbig ti pimmusay a ni as Jay-ar Tanura, agtawen ti dua pulo ket pito ken maysa a residente idiay Barangay Gaddani.
Kabayatanna, nagsagrap ti sugat ti paltog ni Jordan Calaustro Barcena, residente iti Barangat Budac ken dagos a naiturong iti ospital, a natalged itan ti kasasaadna.
Sigun iti Tayum Municipal Police, nakaawatda ti awag manipod iti maysa a concerned citizen seknan iti insidente ti pammaltog a napasamak idiay Sitio Agdamay, Barangay Budac iti agarup alas kuatro ti malem.
Ti nasao a lugar ket dua a kilometro laeng ti kaaddayuna manipod iti municipal police station.
Impadamag metlaeng ti pulisia a napalpaltugan ti convoy ni Tayum mayoral candidate Kathlia Cariño Alcantara bayat ti campaign sortie iti nasao a barangay.
Kinuna ti Tayum Municipal Police a dagiti nagresponde iti nasao nga insidente ket dagiti kamengda babaen ti panangidaulo ni P/Lt. Joel Cagay-an, kaduana RMFB 15 nga idadauloan ni P/Lt. Johnny Binwag ken kameng ti Philippine Army.
Natiliw dagiti polis ti nangisit a Ford Ranger nga imanmaneho ni Jomel Barbieto Molina, agtawen ti duapulo ket maysa, ken nakumpiskar kenkuana ti kalibre .45 a paltog nga awanan serial number ken marka, ken tallo a magasin a nakargaan iti pito a live ammunition.
Nakumpiskar pay manipod iti uneg ti luganna ti calibre .45 pistol nga awanan ti serial number ken awanan ti marka.
Mapapati a kukua ni Tanura dagiti nasao a banag.
Sigun iti Tayum MPS, naiparang iti inisial nga imbestigasion a nagsinnukat ti paltog da Alcantara ken sigud a Bangued Mayor Ryan Luna iti convoy ni Barangay Budac Chairman Walter Tugadi.
Innayon pay ti nasao nga istasion a binigbig ni Barcena da Luna ken Raffy Tejero a paset dagiti nangpaltog a nakalugan iti maysa kadagiti lugan ti convoy ni Alcantara.
Narekober dagiti polis ti sumagmamano nga “spent shell casings” manipud iti caliber .45 ken 5.56 mm firearms iti lugar.
Adda met abut ti bala ti maysa a puraw a Toyota pickup truck a mapapati a paset ti convoy ni Alcantara.
Nasarakan daytoy iti compound ni Luna sadiay Barangay Dangdangla, Bangued, Abra.
