Kinondenar ti Kapisanan ng mga Brodkaster ng Pilipinas ti pangta nga inaramid ni La Paz, Abra Mayor Joseph “JB” Bernos kontra iti maysa a provincial correspondent ti maysa nga istasion ti radio.
Sigun kadagiti damag ken ti agtagikau ti radio station, nakapungtot ni Bernos iti report ti reporter seknan iti insidente ti pammaltog idiay Abra, nga inawagan ti Mayor nga iresponsable a panangipadamag.
Ni Bernos, nga agngayngayangay iti kina-Kongresista idiay Abra ket mapapati a hinarassna ti reporter babaen iti mensahe ken video call, nu sadinno kinunana ti “babalikan kita” kas sungbat ti report ti reporter.
Numan pay saan a direkta a kinuna ti mayor nga aramidenna ti pangta, kinuna ti KBP a ti inaramidna ket nalawag a panangbutbuteng ti maysa a reporter bayat nga ar-aramidenna laeng ti pagrebbenganna.
Gapu kadagiti damag ti kinaranggas mainaig iti eleksion idiay Abra, in-reactivate ti Philippine National Police (PNP) ti maysa a task force tapno mataginayon ti urnos bayat ti eleksion.
Indagadag ti KBP iti PNP, Presidential Task Force on Media Security (PTFoMS), ken dadduma pay nga institusion a dagus a risuten ti insidente.
Kabayatanna, kinondenar metlaeng ti National Press Club ti pangta ken kinunana a nagrugin ti imbestigasion ti Presidential Task Force on Media Security (PTFoMS), kagiddan ti panangpapigsa manen ti Media Vanguard program daytoy kaduana ti Philippine National Police.
