Naiyunay-unay kadagiti kandidato iti siudad ti Baguio a saanda koma nga aramaten dagiti estudyante iti panagkampanya dagitoy.
Kasaruno daytoy ti oathtaking dagiti 300 nga estudyante a naala para iti Special Program for Employment of Student Program iti siudad ti Baguio.
Ti nasao a programa ket inorganiza ti City Government, Public Employment Service Office (PESO) ken Department of Labor and Employment a tinawen a maipatpatungpal.
Sigun kenni Janah Vivian Elitan- Labor Officer 1 ti PESO-Baguio, ti Special Program for Employment of Students (SPES) ket silulukat para kadagiti estudyante a karaman kadagiti low income family, out of school youth ken agtawtawen iti kinse agingga trenta anyos.
Dinakamatna a dua a batch ti nabukel para iti nasao a programa nu sadino dagiti first batch ket nangrugin idi paylaeng napalabas a lawas bayat a dagiti second batch ket mangrugi inton Hunyo.
Innayonna nga agtrabaho dagitoy iti uneg ti 20 nga aldaw manipud iti sigud a 30 nga aldaw gapu ta daytoy laeng ti kabaelan ti pundo a dumanon iti P3 million.
Iti nasao a gatad, 60% ti nagtaud iti City Government bayat a ti 40% ket nagtaud iti Department of Labor and Employment.
Tunggal aldaw ket makaawat dagiti estudyante iti P615 a mabalin nga aramatenda a panggatang kadagiti pagkasapulanda inton sumaruno nga school year.
Imbinglay ni Elitan a kadawyan a trabaho dagiti estudyante ket clerical ken assistant dagiti staff ken sideline laeng ti panagdalos dagitoy.
Iti agdama, ti City Environment and Management Office (CEPMO) ti adaan iti kaaduan nga SPES students a dumanon iti 15 bayat a saggaysa met kadagiti konsehal.
Mangnamnama met ni Elitan a babaen iti daytoy a programa ket matulungan dagiti ubbing para iti paggastusanda.//Bombo Noveh Organo
