Nakasaganan ni senator-elect Rodante Marcoleta iti impeachment trial ni Vice President Sara Duterte a manamnama a mangrugi inton Hulio a trenta.
Nupay kasta, kinuna ni Marcoleta a kasapulan a mapagsasaritaan no rumbeng nga agtultuloy wenno saan ti proseso ti impeachment gaputa nagkurang ti pundasion ti reklamo.
Naobserbaranna a saan nga umno ti pannakaidatag ti nasao a kaso ken saan a nasayaat ti basaran ken ti prosesona.
Ti dakdakamaten ni Marcoleta ket ti confidential funds ni Vice President Duterte a mapapati a saan a nasayaat ti panagaramatna a linaon metlaeng iti impeachment complaint a naipila iti House of Representatives.
Ni Marcoleta nga agtugaw kas maysa kadagiti 24 senator-judges iti impeachment trial ti bise presidente, ket opisial a naiproklamar babaen ti Commission on Elections (Comelec) kas maysa kadagiti sangapulo ket dua a nangabak a senatorial candidates iti kaleppas nga eleksion.
Ti pannakakonbiktar ket kasapulan ti 16 a botos, wenno two-thirds kadagiti senator-judges, bayat a tapno met maabsuelto, kasapulan ni Duterte ti siam a botos.
