Naipaayan ti baro nga Smart Televisions, laptop, ken textbooks ti sumagmamano a parapubliko a pagadalan iti intero a pagilian kagiddan ti panggep ti Department of Education (DepEd) a mamoderno ti edukasion babaen iti digital transformation agenda ni President Ferdinand R. Marcos Jr.
Kas sungbat iti kiddaw ni President Marcos Jr. nga agbalin a “future-ready” ken “inclusive education system,” pinapartak ti Education Department ti panaggatang kadagiti nasao a kagawaan tapno maaramat iti panagadal.
Dagiti panangitulod kadagiti kagawaan ket paset ti FY 2025 Early Procurement Activities (EPA) ti Department of Education nu sadinno, 79% ti tinnawen a pondo ket para iti Computerization Program ti nasao nga ahensia.
Maibasar iti datos, 33,539 a laptop para kadagiti mannursuro ken 5,360 para kadagiti non-teaching staff ti nagatang, ken agtultuloy latta ti panangipaay ti Education Department.
Iti agdama, agarup 26,000 Smart Television packages ti nagatang.
Naituding nga umawat ti Region VII iti nasurok a 2,300 units, bayat nga agtultuloy ti procurement para iti Regions IX ken Cordillera Administrative Region (CAR).
Iti National Capital Region, 1,340 a laptop ti maiwaras kadagiti 268 nga eskuelaan iti nagbaetan ti Hunio 16 ken 26.
