Nabiktima ti maysa a minero iti “bukas kotse” kalpasan a naginum daytoy iti nasanger nga arak iti Lakandula Street, Baguio City.
Ti biktima ket lalaki, agtawen ti 37, tubo ti Mankayan, Benguet ken residente ti Guisad Central, Baguio City bayat a dagiti mairekreklamo ket lalaki, agtawen ti 59, awanan ti panggedan, naasawaan, tubo ti Bauko, Mountain Province, ken residente ti Guisad Central, Baguio City ken maysa pay a lalaki nga agtawen ti 43, single, ken residente ti Lubas, La Trinidad, Benguet.
Maibasar iti inisial nga imbestigasion, imparada ti biktima ti luganna a maroon Toyota Fx tapno aginum kaduana ti barkadana iti Lakandula Street.
Kalpasan ti sumagmamano a minuto, nagsubli ti biktima iti luganna tapno maturog.
Patien ti biktima nga inserrana ti ruangan ti luganna ngem nadlaw daytoy a nakalukat ti tawa ti likudan ti luganna ken maaw-awan ti selponna nga agbalor ti P14,000.
Dagos a nagturong daytoy iti Fixed Visibility Point 2, Police Station 7 ken naranaanna ti presensia ti City Director.
Binuyada ti CCTV footage ken naimatanganda ti aktual a panagtakaw dagiti suspek.
Gapu iti daytoy, dagos met a nagtignay ti operasion ti Police Station 7 a nagresulta iti pannakatiliw dagiti suspek.//Bombo Genzel
