Inlawlawag ni Wilson Bumay-et Jr., Jeepney Federation President ti Baguio-Benguet a ti gunay ti trapiko ken ti kinakurang iti espasyo iti loading area ti agbalbalin a rason iti mapaspasamak a cutting-trip kadagiti jeep nga addaan ruta paturong idiay La Trinidad, Benguet.
Sigun kenni Bumay-et, natalantan kadagiti napan a lawas ti nasao nga isyu kalpasan a nakaawat iti reklamo manipod kadagiti komyuter dagiti maseknan nga opisina iti La Trinidad, Benguet.
Kalpasan a naipakaammo kenni Baguio City Mayor Benjamin Magalong ti nasao a pakaseknan, nagballa-ag daytoy a mapagmulta dagiti aglabsing iti pagannurutan seknan iti illegal deviation wenno iligal a panangibaw-ing kadagiti naituding a ruta.
Sigun kenni Mayor Magalong, mapagmulta dagiti aglabsing iti PhP1,000.
Kinuna met ni Bumay-et a nasayaat ti panagballa-ag ti mayor ken mangnamnama iti panakitinnulong dagiti law enforcers tapno matiliw dagiti aglabsing.//Bombo Rob Dominguez
