Posible a saanen a maparsyakan dagiti tattao a magmagna iti panawen ti panagtutudo iti siudad ti Baguio.
Daytoy ket kalpasan a naipila ti ordinansa a mangimandato kadagiti motorista nga agin-inayad ken mangaramid iti maiparbeng a panagannad nu umasideg kadagiti “puddle” iti asideg dagiti pedestrian areas.
Iti singasing ni Baguio City Councilor Edison Bilog, nakalanad nga aginnayad wenno agsardeng dagiti motorista nu umasideg kadagiti “puddles” wenno bassit a pagurnongan ti danum.
Ikagkagumaan ti addang a lapdan ti pannakawarsi ti danum kadagiti magmagna nga indibidual, a gagangay ngem mabalin a maliklikan bayat ti panawen ti panagtutudo.
Dagiti aglabsing ket mamulta iti warning ken citation iti umuna a panaglabsing, P500 para iti second offense, ken P1,000 ken mandatory attendance iti traffic courtesy seminar para iti third offense, bayat a ti fourth offense ket mamulta ti P2,000 ken walo nga oras a community service.
Mailaksid ditoy dagiti motorista a nagresponde iti emergency.
Dagiti otorisado a mangtiliw kadagiti aglabsing ken mangipaulog iti citation ticket ket ti Baguio City Police Office (BCPO), Traffic and Transportation Management Division (TTMD) ti City Engineering Office, ken dagiti opisyal ti barangay.
Naaprobaranen ti nasao nga ordinansa iti umuna a pannakaibasana iti Baguio City Council idi Agosto a kuatro, ken naiturongen iti Committee on Public Utilities, Transportation, and Traffic Legislation para iti review.
